पोखरा, असोज १६ गते ।किसानले उत्पादन गर्ने बस्तु सोझै उपभोक्ताले खरिद गर्ने गरी पोखराको खपौदिमा शुक्रबारदेखि किसान बजार सञ्चालनमा आएको छ। किसानले उत्पादन गर्दा लागेको मिहिनेत अनुसार उचित मूल्य पाउन र उपभोक्ताले पनि किसानबाट सोझै खरिद गर्दा सस्तो मूल्यमा बस्तु पाउने गरी पोखरा–१८ खपौदिमा किसान बजार सञ्चालनमा आएको हो ।
बजारको पोखरा महानगरपालिकाका प्रमुख मानबहादुर जिसीले शुक्रबार उद्घाटन गर्नुभयो । उहाँले किसानले उचित मूल्य पाउन् र उपभोक्ता पनि नठगिउन् भन्ने उद्देश्यले किसान बजार सञ्चालनमा ल्याइएको बताउनुभयो । किसानलाई कृषि उत्पादनमा लाग्न प्रेरणा दिन र उपभोक्तालाई एक दुई पैसा भए पनि सस्तो र विषादीमुक्त गर्ने वातावरण बनाउने उद्देश्यले किसान बजार स्थापना गरिएको महानगर प्रमुख जीसीको भनाई थियो ।
‘किसानबाट सस्तोमा जाने र महङगोमा बेच्ने अवस्थाको अन्त्यका लागि किसानबाटै उपभोक्ताले किन्ने अवस्था सृजनाहोस भनेर बजार सञ्चालन गरेका हौ ।’पोखरा महानगरपालिकाको आर्थिक सहयोगमा भवन र स्टल बनाइ बजार सञ्चालनमा ल्याएको हो । महानगरको ६ लाख रुपैयाँमा बजार सञ्चालनमा ल्याइएको महानगर कृषि महाशाखा प्रमुख मनहर कडरियाले जानकारी दिनुभयो ।
किसान बजारमा किसान आफैंले उत्पादन गरेका बस्तु तरकारी, खाद्यान्न, दुग्धजन्य बस्तु, माछा, खसी, बोका लगायत स्थानीयले उत्पादन गरेका सामग्री बिक्री वितरणमा राख्न सक्ने व्यवस्था गरिएको छ । किसानले उत्पादन गरेका बस्तु एक दुई दिन राख्नु परे पनि उचित व्यवस्थापनका लागि कोल्डस्टोरको व्यवस्था महानगरपालिकाले गर्ने पोखरा महानगरपालिकाका कृषि तथा पशु महाशाखा प्रमुख कडरियाले जानकारी दिनुभयो ।
महानगरपालिकाले डिजिटल तराजुलगायत बस्तु बिक्री गर्दा आवश्यक पर्ने सबै सामग्री महानगरपालिकाले नै व्यवस्था गरेको बताउनुभयो । पोखरा महानगरपालिकाका तीन वडाका किसानले उत्पादन गरेका कृषिजन्य बस्तुहरु विक्री वितरण गर्न सहज हुने अपेक्षा गरिएको छ । पोखरा महानगर १८, २४ र २३ का किसानले उत्पादन गरेका कृषिजन्य बस्तुहरु त्यहाँ राखेर बेच्न सकिने छ ।