पक्की सडक बन्ने भएपछि पोखरा १९ घार्मीबासीहरु हर्षित

जिल्लाबाट चुनियर गएका विभिन्न सभासदले आश्वासन दिएपनि सधैँ निराश हुने गरेका उपभोक्ताहरु अमलाविसौनी घार्मी आलेबारी ग्रामिण सडक राष्ट्रिय योजना आयोगको रातो पुस्तिकामा पहिलो नम्बरमा परेपछि भने अब ढुक्क भएका हुन् । सभासद कुमार खड्काले सडक निर्माणका लागि गरेको पहल सफल भएकोमा स्वंय सभासद खड्का पनि हर्षित हुनुभएको छ । स्थानियवासीले सभासद खड्कालाई धन्यवाद मात्र दिएका छैनन्, विकासप्रेमी नेता भन्दै थप विकासका योजनाहरु गाउँमा भित्राउन आग्रह गरेका छन् ।

त्यस्तै सभासद खड्काले सडक निर्माणमा खेलेको भूमिकाप्रति खुसी व्यक्त गर्दै, सडक उपभोक्ता समितिले सभासद खड्का, सरकार र राष्ट्रिय योजना आयोगप्रति धन्यवाद दिएको छ । समितिका सल्लाहकार एंव एमाले कास्कीका सचिवालय सदस्य शोभामोहन पौडेल, समितिका अध्यक्ष धर्मराज आचार्य, सचिव डिल्लीराम पौडेल, अनुगमन समितिका कमलमोहन आचार्य लगायतले धन्यवाद ज्ञापन गरेका हुन् । केही दिन अगाडि सडक निर्माणमा पहल गरिदिन भन्दै उपभोक्ताहरु सभासद खड्का समक्ष पुगेका थिए ।

सोही अवसरमा उहाँले आफ्नो पहिलो प्राथमिकता नै सडक भएको भन्दै बजेट छुट्टिने र सरकारको प्राथमिकता पर्ने बताउनुभएको थियो । उहाँले भेट्न गएका उपभोक्तालाई विकासका लागि कसैलाई पनि काखा र पाखा नगर्ने समेत बताउनुभयो । सभासद खड्कालाई भेट्न सल्लाहकार पौडेल, अध्यक्ष आचार्य, सचिव एंव एमालेका स्थानिय नेता डिल्लीराम पौडेल, युवा व्यवसायी प्रमोद पौडेल, कमलमोहन आचार्य, पत्रकार शिशिर पौडेल, स्थानियवासी रामचन्द्र पौडेल सभासदकै निवासमा पुगेका थिए ।

सल्लाहकार पौडेलले सडक निर्माणलाई प्राथमिकता दिन सभासद खड्कालाई पटक पटक ध्यानाकर्षण गराउनुभएको थियो । आयोगको रातो पुस्तिकामा नै समावेश भएपछि उक्त सडक निर्माणका लागि अब वार्षिक रुपमा बजेट छुट्टिने भएको छ । केही महिना अघि मात्रै पोखरा उपमहानगरपालिकामा गाभिएको उक्त क्षेत्र ठूला दलका नेताहरुको बेवास्ताका कारण विकास निर्माणका योजनाबाट पछि पर्दै गएको छ । सभासद खड्ककै पहलमा कास्कीको लाहाचोक, अर्मला, मध्यमपथबाट तुलसीघाट जाने बाटो पनि आयोगको पहिलो प्राथमिकतामा परेको छ ।