पोखरा, फागुन २४ गते । गत वर्ष जेठमा अक्सिजन अभावका कारण पोखराकै पुरानो सरकारी अस्पताल पोखरा स्वास्थ्य विज्ञान प्रतिष्ठानमा सुत्केरी महिला सहित ६ जनाले ज्यान गुमाए । विश्वब्यापी रुपमा फैलिएको कोरोना भाइरसका कारण अक्सिजन अभाव हुदाँ पोखरा स्वास्थ्य विज्ञान प्रतिष्ठानको कोभिड–१९ अस्पतालमा उपचाररत ६ जनाले ज्यान गुमाएको समाचारले सबैको मन रोयो । गण्डकी प्रदेशबासीहरुले मन त दुख्यौ नै । विदेशमा रहेका नेपालीहरुले दुखद खवर सुन्दा अझै नरमाइलो भयो । जेठ १४ गतेका स्थानियदेखि राष्टिय सञ्चार माध्यममा समाचार प्रमुखताका साथ प्रकाशित भए, ‘अक्सिजन अभावमा सुत्केरी महिला सहित ६ जनाको मृत्यु ।’ यो समाचार देशविदेशमा फैलियो ।
तनहुँका ३ जना, म्याग्दी, पर्वत र स्याङ्जाका १÷१ जना गरी ६ जनाको ज्यान गएको हो । अस्पतालमा एक्कासी अक्सिजनको अभाव भएको र हाइफ्लो दिएर उपचार भइरहेका बिरामीले सोही अनुसार अक्सिजन नपाउँदा मृत्यु भएको चिकित्सकले बताए । अव गण्डकी प्रदेशमा अक्सििनकै अभावमा कसैले ज्यान गुमाउनुपर्ने अवस्थाको अन्त्य भएको छ । अव गण्डकी प्रदेशका नागरिकले अक्सिजनको अभावमा अकालमै मृत्युवरण गर्नुपर्ने अवस्थाको अन्त्य भएको छ । प्रवासी नेपाली मञ्च अन्तराष्ट्रिय कमिटिले पोखरा स्वास्थ्य विज्ञान प्रतिष्ठानमा अक्सिन प्लान्ट स्थापना गरेको छ । मञ्चले २ करोडको लागतमा प्लान्ट स्थापना गरेको प्रवासी नेपाली मञ्च अन्तराष्टिय कमिटिका अध्यक्ष भक्त गुरुङले जानकारी दिनुभयो । विभिन्न देशमा रहेका ३५ कमिटि र पाँच महादेशमा रहेका नेपालीको सहयोगमा जर्मन टेक्नोलोजिको अक्सिजन प्लान्ट चिनबाट खरिद गरिएको उहाँले बताउनुभयो ।
यो प्लान्ट जडानसंगै अव गण्डकी प्रदेशमा मात्रै हैन देशका अन्य अस्पतालहरुमा समेत आवश्यक भएमा यहाँबाट सिलिण्डरमा अक्सिन भरेर लैजान सकिन्छ । पोखरा स्वास्थ्य विज्ञान प्रतिष्ठान सरकारीस्तरबाट सञ्चालित सबैभन्दा ठूलो अस्पताल हो । यो झण्डै ७ सय सैयाको अस्पताल हो । यहाँ बार्षिक ३ लाख विरामीले सेवा लिने गरेको प्रतिष्ठानका उपकुलपति डुकबहादुर क्षेत्रीले बताउनुभयो । उहाँका अनुसार यो अक्सिनज प्लान्टले दैनिक २ सय सिलिण्डर उत्पादन गर्ने क्षमता रहेको छ । अक्सिजन आवश्यकताका आधारमा उत्पादन गरिरहेको उहाँले जानकारी दिनुभयो ।
यसैवीच अक्सिजन प्लान्टको एमाले अध्यक्ष एवं पूर्वप्रधानमन्त्री केपी शर्मा ओलीले सोमबार उद्घाटन गर्नुभयो । उहाँले प्लान्ट स्थापनाले अक्सिजनकै अभावमा ज्यान गुमाउनुपर्ने अवस्थाको अन्त्य भएको बताउनुभयो । अक्सिनकै अभावमा ज्यान गुमाउनुपर्ने भएकाले यो महत्वपूर्ण रहेको बताउदै भन्नुभयो,‘ अक्सिजनकोअभावमा अव मृत्यु हुदैन् । यो यहाँ मात्रैहैन अन्यत्र समेत लैजान सकिन्छ ।’ उहाँले आफनो प्रधानमन्त्री कालमा स्वास्थ्य नीति निरोगी नेपाल भन्ने नारा राखेर अगाडी बढेको बताउनुभयो । नागरिकलाई रोग लाग्नै नदिने नीति अनुसार स्वस्थ, स्वाच्छ र सन्तुलित खाना खान पाउने अवस्था भएमा रोग नलाग्ने उहाँको भनाई थियो । उहाँले स्वाथ्यलाई प्राथमिकतामा राखेर ३९६ वटा अस्पताल एकै दिन शिलान्यास गरिएको समेत बताउनुभयो । हरेक पालिकामा ५ देखि १५ बेडसम्मका अस्पताल स्थापना गर्नुपर्छ भन्ने मान्यता सहित शिलान्यास गरिएको बताउनुभयो ।