काठमाडौँ,चैत १ गते । नेपाल वनस्पति घिउ तेल उत्पादक सङ्घले प्रशोधित खाने तेलको अनावश्यक मौज्दात र कृत्रिम अभाव नगर्न आग्रह गरेको छ । युक्रेनमाथि रुसले गरेको सैनिक हमलाले नेपालको बजारमा समेत मूल्य वृद्धिको प्रत्यक्ष असर देखिएका चर्चा गर्दै सङ्घले आफ्ना सदस्य उद्योगलाई कृत्रिम अभाव नगरी खाने तेलको आपूर्तिलाई सुचारु राख्न आग्रह गरेको हो । सङ्घले उपभोक्तालाई समेत अनावश्यक रूपमा भण्डारण नगर्न आग्रह गरेको छ ।
सङ्घका अध्यक्ष सन्दीप अग्रवालले युक्रेन र रुसबीचको युद्ध मत्थर हुनेबित्तिकै कच्चा तेलको आयात सामान्य हुने भएकाले आमउपभोक्तालाई अनावश्यक तेल खरिद गरेर घरमा नराख्न आग्रह गर्नुभयो ।उहाँले नेपालमा खाने तेल शतप्रतिशत आयातमा निर्भर रहेको र ती देशमा चलेको युद्धका कारण कच्चा पदार्थको मूल्य नियन्त्रणबाहिर गएकाले युद्ध सल्टिनेबित्तिकै मूल्य घट्ने जानकारी दिनुभयो ।