पोखरा, भदौ ९ गते । नेकपा एमालेका केन्द्रीय सदस्य एवं पोखरा महानगरपालिकाका उपप्रमुख मञ्जुदेवी गुरुङले नेपाली महिलाहरुले धेरै अधिकार प्राप्त गरेको भन्दै अव त्यसको कार्यान्वयन गर्नुपर्ने खाँचो औल्याउनु भएको छ ।
अखिल नेपाल महिला संघ माछापुच्छे गाउँपालिका कमिटिले बिहिबार आयोजना गरेको हरितालिका तिजको शुभकामना आदान प्रदान तथा दर खाने कार्यक्रममा बोल्दै उहाँले भन्नुभयो, ‘नेपाली महिलाले विगतमा जस्तो दुःख र पीडाका गीत गाँउने अवस्था छैन । धेरै अधिकार प्राप्त भएका छन् । ती अधिकारको कार्यान्वयन गर्नुपर्छ ।’
उहाँले हिजोको जस्तो महिलालाई अहिले कठिन अवस्था छैन् त्यसैले विरहका हैन, विकास र समृद्धिका गीत गाँउनुपर्नेमा जोड दिनुभयो ।उपप्रमुख गुरुङले तीज सांस्कृतिक पर्व भएको बताउदै चाडपर्वले धार्मिक सहिष्णुता र सामाजिक सद्भाब मजबुद बनाउने बताउनुभयो ।
अनेमसंघ माछापुच्छे गाउँपालिका अध्यक्ष कृष्णकुमारी दवाडीको अध्यक्षतामा सम्पन्न कार्यक्रममा नेकपा एमाले केन्द्रीय सल्लाहकार समिति सदस्य देवी सुवेदी, गणेशमान गुरुङ, एमाले गण्डकी प्रदेश सचिवालय सदस्य शर्मिाला गुरुङ, प्रदेश सदस्य जगन्नाथ बास्तोला, अनेमसघ कास्कीका संयोजक शुसिला पौडेल पराजुली लगायतले बोल्नुभएको थियो ।