पोखरा, माघ २८ गते ।दस जोड दुईमा आध्ययनरत विद्यार्थीहरूलाई लक्षित गरी पोखराको मदरल्याण्ड माध्यमिक विद्यालयमा गठित काइन्डनेस क्लबले आयोजना गरेको जिल्लास्तरीय वक्तृत्वकला प्रतियोगिता विद्यालय प्राङ्गणमा एक समारोहबिच शुक्रबार सम्पन्न भएको छ।
विशेष गरी विद्यालय तहका विद्यार्थीहरूमा दया, माया, करुणा, परोपकार र मैत्रीपूर्ण भावनाको विकास गर्ने उद्देश्यले स्थापित उक्त क्लबले समयसमयमा समुदायमा सहयोग पनि गर्दै आएको कुरा क्लबका परिकल्पनाकार एवम् अमेरिकाको शिक्षा क्षेत्रमा लामाे अनुभव सँगाल्नुभएकाद्वय दुर्गामाया एन्डर्सन र देव एन्डर्सनले बताउनुभयो। साथै मदरल्याण्डमा पाठ्यक्रम नै बनाएर काइन्डनेस कक्षाहरू पनि सञ्चालन गररेको कुरा व्यक्त गर्नुभयो।
नेपाली र अङ्ग्रेजी दुबै भाषामा आयोजित उक्त प्रतियोगितामा मदरल्याण्ड माविकी छात्रा प्रशंसा बरालले प्रथम स्थान हात पार्न सफल भएकी छन् भने द्वितीय, तृतीय र सान्त्वना स्थान क्रमशः स्नोभ्यु बोर्डिङ स्कुल हेमजाकी सम्झना भण्डारी, विन्ध्यवासिनी मावि बाटुलेचौरका सुवास तामाङ र भानुभक्त मावि सिम्पानीका निराज क्षेत्री कार्कीले प्राप्त गर्न सफल भएका छन्।
विजयी विद्यार्थीहरूलाई विद्यालय निर्देशक त्रिभुवन शर्मा, प्रचार्य नारायण बराल, क्लबका परिकल्पनाकार लगायतले बधाईका साथ नगद, प्रमाणपत्र र ट्रफी पुरस्कार स्वरूप वितरण गर्नुभएको कुरा सञ्चार प्रमुख होमनाथ भट्टराईले जानकारी दिनुभयो।
काइन्डनेस क्लबका अध्यक्ष निश्चल बाँस्तोलाको सभापतित्वमा सम्पन्न उक्त कार्यक्रमको सञ्चालन विद्यालयका शिक्षक विनीत छन्त्यालले गर्नुभएको थियो।