आयोजक ग्रिन्ल्याण्ड स्कुल १७ औं क्विक्स ग्रिन्ल्याण्ड बास्केटबल प्रतियोगिताको सिनियर ब्वाईज तर्फ उपाधी जित्न सफल भएको छ ।
आयोजककै आफ्नै कोर्टमा भएको प्रतियोगितामा ग्रिनल्याण्डले प्रविन गुरुङ्गको ३० अंक मद्धतले भ्याली पब्लिकलाई ८३–७२ अंकले पराजित गर्दै उपाधी जितेको हो ।
सिनियर गल्र्स तर्फको प्रतिस्पर्धामा भ्याली पब्लिकले उपाधी उचाल्यो । भ्यालीले सत्य साईलाई ३५–१५ अंकले पराजित गर्दै उपाधी कब्जा गरको हो । भ्यालीको जितमा लोरिश गौचनको २२ अंकको योगदान रह्यो ।
यस्तै जुनियर ब्वाईज तर्फ गोल्डेन पिकले एन्जल हर्टलाई २१–१७ ले पराजित गर्दै उपाधी उचालेको हो । गोल्डेनको जितमा पासाङ्ग शेर्पाले ११ अंकको योगदान गरे ।
प्रतियोगिताको मोष्ट भ्यालुएबल खेलाडीमा सिनियर ब्वाईज तर्फ ग्रिनल्याण्ड हाईस्कुलका सुरेश डि.सी., सिनियर गल्र्स तर्फ भ्याली पब्लिककी एन्जल गुप्ता र जुनियर ब्वाईज तर्फ गोल्डेन पिकका निङ्गमा शेर्पा घोषित भए ।
विजयी खेलाडीहरुलाई प्रमुख अतिथी टोखा नगरपालिकाका प्रमुख प्रशासकीय अधिकृत शेर बहादुर बि.सी., टोखा नगरपालिका शिक्षा विभाग प्रमुख बाबुराम गौतम, ग्रिनल्याण्ड हाईस्कुलका प्रिन्सिपल थकिन कुमार गुरुङ्ग, सहायक प्रिन्सिपल विनोद घिमिरेलगायतले पुरस्कार वितरण गरेका थिए ।
प्रतियोगितामा सिनियर ब्वाईज तर्फ २८, गल्र्स तर्फ २४ र जुनियर तर्फ १६ स्कुलको सहभागिता रहेको थियो ।