फागुन, पोखरा २६ गते ।पोखरामा आजदेखि प्रेस चौतारी नेपालको नवौं राष्ट्रिय महाधिवेशनको सुरु हुदैछ ।महाधिवेशनको सम्पूर्ण तयारी पुरा भएको छ भने प्रतिनिधिहरु पोखरा आएका छन् । भोलि शनिबार सम्म चल्ने महाधिवेशनको उद्घाटन एमाले अध्यक्ष एव पूर्वप्रधानमन्त्री केपी शर्मा ओलीले गर्ने छन् । आज ११ बजे पोखरा सभागृहमा महाधिवेशन उद्घाटन हुने छ । चौतारीको महाधिवेशन नीति र नेतृत्वको हिसाबले महत्वपूर्ण रहेको महाधिवेशन मुल व्यवस्थापन समितिका संयोजक गणेश पाण्डेले बताउनुभयो । महाधिवेशनमा अहिलेको सञ्चार क्षेत्रको मुद्दाका बारेमा गहन रुपमा छलफल हुने उहाँले जनाउनुभयो ।
‘प्रेस चौतारीको नवौं महाधिवेशन नीति र नेतृत्वको हिसाबले महत्वपूर्ण छ, महाधिवेशनमा अहिलेको सञ्चार क्षेत्रको मुद्दाका बारेमा गहन ढंगले बन्दसत्रमा छलफल हुन्छ’ उहाँले भन्नुभयो ।नयाँ नेतृत्व चयन हुने भएकोले समेत यो महाधिवेशनलाई धेरैले चासोको रुपमा हेरेका छन् । महाधिवेशनबाट सर्वसम्मत ढंगले नयाँ नेतृत्व चयन हुने संयोजक पाण्डेले बताउनुभयो । ‘अहिलेको परिवर्तन पत्रकारितामा आएका चुनौतीहरुलाई बोक्न सक्ने खालको नयाँ नेतृत्व चयन गर्दै हार्दिकताका साथ सहमतिमै अधिवेशन सम्पन्न हुनेछ’ हालका उपाध्यक्ष समेत रहनुभएका पाण्डेले भन्नुभयो ।
महाधिवेशनको उद्घाटनमा ११ जना पत्रकारलाई पुरस्कृत गरिने छ । जसअनुसार हृदयचन्द्र सिंह प्रधान पत्रकारिता पुरस्कार २०७७ बाट प्रेस चौतारीका पूर्व अध्यक्ष राजेन्द्र अर्याल तथा २०७८ बाट अर्का पूर्व अध्यक्ष गगन विष्टलाई प्रदान गरिने भएको छ ।
अग्निशिखा पत्रकारिता पुरस्कार २०७७ कृष्ण विनोद लम्साल तथा २०७८ बाट झलक सुवेदी पुरस्कृत हुनुहुने भएको छ । डेकेन्द्र थापा पत्रकारिता पुरस्कार २०७७ सागर पण्डित र २०७८ हिरा परियारलाई प्रदान गरिनेछ । वीरेन्द्र साह क्रियाशिल पत्रकारिता पुरस्कार २०७७ बाट केपी गौतम र २०७८ बाट अनुप तिवारी पुरस्कृत हुनुहुनेछ । चन्द्र न्यौपाने शान्तिराम कार्की पत्रकारिता पुरस्कारबाट शान्ति गुरुङ तथा पदम लक्ष्मी सावित्री स्मृति पत्रकारिता पुरस्कार २०७७ अब्दुल्ला मिया र २०७८ शिवराज भट्टलाई प्रदान गरिनेछ ।
महाधिवेशनमा देशभरका झण्डै १ हजार २ सय पत्रकारको सहभागीता रहनेछ । चौतारीको नेतृत्वका लागि गणेश पाण्डे माधव नेपालले आकाक्षा देखाएका छन भने वर्तमान अध्यक्ष गणेश बस्नेत फेरी दोहोरीने हल्ला चलेको छ । तर पार्टी नेतृत्व तिनैजनाको विकल्पको खोजीमा रहेको स्रोतले जनाएको छ । विकल्पमा प्रमोद दाहाल, श्रीधर आचार्यको नाम चर्चामा रहेको छ ।