बागलुङ, फाल्गुन ५ गते । विगत चार वर्ष यता बागलुङमा सत्र वटा संरक्षित जंगली जनावर मृत अवस्थामा फेला परेका छन् । डिभिजन वन कार्यालयका अनुसार मृत अवस्थामा फेला पर्ने सबैभन्दा बढी संरक्षित जनावर चितुवा छन् ।
चार वर्षको अवधिमा नौ वटा चितुवा मृत अवस्थामा फेला परेको डिभिजन वन कार्यालय बागलुङका प्रमुख मुकुन्द्र अधिकारीले जानकारी दिनुभयो । घाइते अवस्थामा फेला पर्ने चितुवा उपचार अभावले मर्ने गरेका छन् । तत्काल उपचारको कुनै व्यवस्था नहुँदा घाइते अवस्थामा भेटिने जनावरको मृत्यु हुने गरेकाे छ ।
जिल्लामा रहेको भेटेनरी अस्पतालले घरपालुवा जनावरको उपचार गर्ने तर जंगली जनावरको उपचारमा प्राविधिक नहुँदा गम्भीर घाइते चितुवाले उपचार नपाएको कार्यालय प्रमुख अधिकारीको भनाइ छ ।वि.सं. २०७३ यता ध्वासे चितुवा एक, रतुवा पाँच, चितुवा आठ, वन बिरालो दुई र घोरल एक मृत अवस्थामा फेला परेका थिए ।