काठमाडौं, फागुन २७ गते । प्रधानमन्त्री एवं नेकपा (एमाले) का अध्यक्ष केपी शर्मा ओलीसँग राजनीतिक परामर्श गर्न जनता समाजवादी पार्टी (जसपा) का नेताहरु बालुवाटार पुगेका छन् ।
सर्वोच्च अदालतको फैसलापछि देशको राजनीति नयाँ समिकरणको प्रयासमा रहेकाबेला जसपाका नेताहरु आफ्नो माग मुद्दा सम्बोधन गराउन र राजनीतिक निकासका लागि संसदको प्रमुख राजनीतिक दल एमालेका अध्यक्ष तथा प्रधानमन्त्रीसँग परामर्श गर्न पुगेका हुन् । बैठकमा जसपाका पाँच नेताहरुको सहभागीता रहेको छ । नेता लक्ष्मणला कर्णँकाअनुसार संघीय परिषद अध्यक्ष डा. बाबुराम भट्टराई, केन्द्रीय परिषदका अध्यक्षद्वय महन्थ ठाकुर, उपेन्द्र यादव, केन्द्रीय नेताहरु राजेन्द्र महतो र अशोक राईको बैठकमा सहभागीता रहेका छन् ।
सपाका नेताहरु पछिल्लो समय राजनीतिक परामर्शलाई तिव्र बनाउनुभएको छ । पार्टीका नेता तथा सांसद रेशम चौधरीसहितका नेता कार्यकर्ताहरुको रिहाई, मधेससँग सम्बन्धित मुद्दा सम्बोधनका लागि संविधान संशोधनको विषयलाई प्रमुखरुपमा जसपाले उठाउँदै आएको छ । प्रधानमन्त्रीले आफूहरुको माग मुद्दा सम्बोधन गर्ने प्रतिवद्धता जनाउनुभएमा सत्ता सहकार्यका लागि समेत तयार हुने सो दलले बताउँदै आएको छ ।