पाेखरा, माघ १९ गते । पोखरामा सामुदायिक (सरकारी) विद्यालयस्तरीय छात्रछात्रा भलिबल प्रतियोगिता हुने भएको छ ।
सिर्जना विकास केन्द्र पोखरा र कास्की जिल्ला भलिबल संघको संयुक्त आयोजनामा आगामी फागुन १६ देखि १९ गतेसम्म पोखरा रङ्गशालास्थित भलिबल कोर्टमा पाँचौ सृजना कप भलिबल प्रतियोगिता सञ्चालनको तयारी गरिएको हो ।
भलिबल खेलको विकास, विस्तार र खेलाडी उत्पादनको लक्ष्यसहित प्रतियाेगिता गर्न लागिकाे आयाेजकले जनाएको छ ।
नेपालको राष्ट्रिय खेल भलिबललाई थप लोकप्रिय बनाउन र विद्यालयबाट खेलको जग बलियो बनाइ जिल्ला, प्रदेश तथा राष्ट्रिय अन्तर्राष्ट्रियस्तरका खेलाडी उत्पादन गर्ने उद्देश्यले पाँचौँ संस्करणको ‘सिर्जना कप सामुदायिक विद्यालय छात्रछात्रा भलिबल’ प्रतियोगिता गर्न लागिएको केन्द्रका अध्यक्ष कृष्णबहादुर थापाले पत्रकार सम्मेलनमा जानकारी दिए ।
उनका अनुसार स्वास्थ्यका लागि खेलकुद, राष्ट्रका लागि खेलकुदको मूल नारालाई आत्मसाथ गरी स्कुल स्कुलमा भलिबल खेल पुर्याउने लक्ष्यसहित प्रतियोगितालाई निरन्तरता दिइएको हो ।
‘खेलकुदमा पछि परेको सामुदायिक विद्यालयमा प्रतियोगिताले भलिबल खेलको विस्तार र खेलाडी उत्पादनमा मद्दत पुग्नेछ । गाउँ–गाउँबाट नवप्रतिभाले आफ्नो खेल कौशल प्रस्तुत गर्ने अवसर पाउनेछन्,’ उनले भने ।
प्रतियोगिताले कुना कन्दरामा लुकेर रहेका प्रतिभाले आफ्नो प्रतिभा उजागर गर्न पाउने र त्यसबाट राम्रा खेलाडी उत्पादन हुने विश्वास आयोजकको छ ।
कास्कीका सामुदायिक विद्यालयमा कक्षा १२ सम्मका विद्यार्थीले प्रतियोगितामा सहभागिता जनाउन सक्नेछन् । कुल ५० विद्यालयले उपाधिका लागि प्रतिस्पर्धा गर्ने विश्वास आयोजकको छ ।
प्रतियोगिताको उपाधि विजेता छात्रछात्रा दुवै तर्फकालाई रु एक÷एक लाख, उपविजेतालाई रु ६०/६० हजार र तृतीय हुने विद्यालयलाई ३५/३५ हजारसहित शिल्ड, मेडल र प्रमाणपत्र प्रदान गरिने प्रतियोगिता संयोजक मीनप्रसाद भट्टराईले जानकारी दिए ।