पोखरा, माघ २३ गते ।विभागीय क्लब सशस्त्र प्रहरी बललाई २–० गोलले पराजित गर्दै मछिन्द्र फुटबल क्लब २४ औं आहा रारा पोखरा गोल्डकप फुटबल प्रतियोगिताको अन्तिम आठमा प्रवेश गरेको छ । बुधबार दिउँसो पोखरा रंगशालामा भएको प्रतिस्पर्धामा मछिन्द्रले दुवै गोल दोस्रो हाफमा गर्दै जित दर्ता गरेको हो ।
पहिलो मिनेटमा आयुष घालानलाई फउल गरेपछि प्राप्त फ्रिकिको अवसर मछिन्द्रले पायो । ओमोलाजा नुरेन करीमको प्रहार सशस्त्रका गोलकिपरले बचाउ गरे । ३५ औं मिनेटमा अर्को फ्रिकिकलाई पनि मछिन्द्रले सदुपयोग गर्नबाट चुक्यो । करीमको प्रहारलाई मनिष डाँगीले हानेको हेड बल आउट हुन पुग्यो । ४१ औं मिनेटमा अनिष श्रेष्ठको प्रहार पन्च सेभ गरेर बचाउ गरेपछि पहिलो हाफ मछिन्द्रको प्रयास असफल रह्यो ।
४५ औं मिनेटमा सशस्त्रले मौका पायो । प्रदीप लामाले दुई डिफेन्सलाई कटाउँदै सिक्स यार्ड बक्सबाट फष्ट बारमा प्रहार गर्न खोजेको बललाई अनुभवी मछिन्द्रका गोलकिपर विशाल श्रेष्ठले बचाउ गरे । खेलको ७४ औं मिनेटमा बैकल्पिक खेलाडी अदित्य शाक्यले पहिलो गोल गर्दै मछिन्द्रलाई खाता खोले । दोस्रो गोल खेलको ८३ औंमा गर्दै मछिन्द्रले अग्रतासँगै जित सुनिश्चित बनायो । स्टेफल कामाहाले गोल गरे । उनी खेलको प्लेयर अफ दि म्याच घोषित भए ।
सहारा क्लबको आयोजना तथा हिमश्री फुड्सको मुख्य प्रायोजन तथा जयश्री फुड्सको सह प्रायोजनमा रहेको प्रतिस्पर्धामा बिहीबार एनआरटीले अपी पावर चर्चब्वाईज युनाईटेडसँग प्रतिस्पर्धा गर्ने छ