पोखरा, कात्तिक १ गते ।प्रधानमन्त्री केपी शर्मा ओलीले मुलुकलाई गरिवीबाट समृद्धितर्फ र जनतालाई विपन्नताबाट सम्पन्नतातर्फ लैजाने राष्ट्रिय आकाङ्क्षा पूरा गर्ने सार्थक उत्प्रेरणा गरिबी निवारण दिवसले प्रदान गरोस भन्ने कामना गर्नुभएको छ ।
अन्तर्राष्ट्रिय गरिबी निवारण दिवसको अवसरमा शुभकामना सन्देश जारी गदै उहाँले आर्थिक सामाजिक रूपमा पछाडि परेका जनताको आधारभूत आवश्यकता परिपूर्ति गर्ने, सवै प्रकारका साधन स्रोत र अवसरहरुमा पँहुच सुनिश्चित गर्ने, आत्मसम्मानपूर्वक वाँच्ने र मानवअधिकारको संरक्षण गर्दै जनताको जीवनस्तर उठाउने काममा सरकार निष्ठापूर्वक सक्रिय रहेको बताउनु भएको छ । गरिबी निवारण नीति, पन्ध्रौं योजना, दीगो विकास लक्ष्यहरु, सार्क तथा विमस्टेक गरिबी निवारण कार्ययोजनाहरु तय गरिसकेको उल्लेख गदै उहाँले भन्नुभएको छ, निरपेक्ष गरिवीको रेखामुनी रहेको १८.७ प्रतिशत जनसंख्यालाई आगामी १० वर्ष सम्ममा ५ प्रतिशत भन्दा तल सीमित गर्दै आगामी २३ वर्ष भित्र शुन्यमा झार्ने र सन् २०३० सम्ममा नेपाललाई मध्यम आय भएको मुलुकका रुपमा उभ्याउने संकल्प गरेका छौँ ।
सम्माननीय प्रधानमन्त्री केपी शर्मा ओलीले दिनुभएको शुभकामना सन्देश
अन्तर्राष्ट्रिय गरिवी निवारण दिवस, २०२० को अवसरमा सम्पूर्ण दिदीबहिनी तथा दाजुभाइहरुमा हार्दिक शुभकामना ब्यक्त गर्दछु । मुलुकलाई गरिवीबाट समृद्धितर्फ र जनतालाई विपन्नताबाट सम्पन्नतातर्फ लैजाने राष्ट्रिय आकाङ्क्षा पूरा गर्ने सार्थक उत्प्रेरणा यस दिवसले प्रदान गरोस् भन्ने शुभकामना दिन चाहन्छु ।
संयुक्त राष्ट्र संघले सन् १९९३ देखि हरेक वर्ष अक्टोवर १७ लाई अन्तर्राष्ट्रिय गरिबी निवारण दिवसको रुपमा मनाउँदै आएको छ । यसै सन्दर्भमा आज हामी अन्तर्राष्ट्रिय गरिवी निवारण दिवस मनाइरहेका छौं । आर्थिक सामाजिक रूपमा पछाडि परेका जनताको आधारभूत आवश्यकता परिपूर्ति गर्ने, सवै प्रकारका साधन स्रोत र अवसरहरुमा पँहुच सुनिश्चित गर्ने, आत्मसम्मानपूर्वक वाँच्ने र मानवअधिकारको संरक्षण गर्दै जनताको जीवनस्तर उठाउने काममा सरकार निष्ठापूर्वक सक्रिय रहेको यस अवसरमा स्मरण गराउँछु ।
लामो समयदेखि सञ्चालित गरिव लक्षित कार्यक्रमहरुको प्रतिफल वास्तविक गरिबहरुसम्म अपेक्षित रुपमा पुग्न नसकेका विगतका कमजोरीहरुबाट पाठः सिकेर हामीले गरिबी निवारणको आगामी बाटो तय गरेका छौं । हामीले गरिबी निवारण नीति, पन्ध्रौं योजना, दीगो विकास लक्ष्यहरु, सार्क तथा विमस्टेक गरिबी निवारण कार्ययोजनाहरु तय गरिसकेका छौं । निरपेक्ष गरिवीको रेखामुनी रहेको १८.७ प्रतिशत जनसंख्यालाई आगामी १० वर्ष सम्ममा ५ प्रतिशत भन्दा तल सीमित गर्दै आगामी २३ वर्ष भित्र शुन्यमा झार्ने र सन् २०३० सम्ममा नेपाललाई मध्यम आय भएको मुलुकका रुपमा उभ्याउने संकल्प गरेका छौँ ।
यस संकल्प मार्फत् गरिवी निवारण गरी समृद्ध नेपाल, सुखी नेपालीको राष्ट्रिय आकाङ्क्षा पूरा गर्न हामी सक्रिय छौं । गरिबी निवारणका यी लक्ष्यहरु हासिल गर्न सर्वसुलभ आधुनिक पूर्वाधार एवं मानव पूँजी निर्माण, उच्च र दीगो उत्पादन तथा उत्पादकत्व वृद्धि, उच्च र समतामुलक राष्ट्रिय आय निर्माण गर्न हामी योजनावद्ध ढंगले अगाडि वढिरहेका छौं । मानव अधिकारको संरक्षण, समावेशी एवं न्यायपूर्ण समाजको निर्माण, सन्तुलित एवं दीगो विकासमा हामीले आशातीत सफलता प्राप्त गरिरहेका छौं । कृषि, पर्यटन, जलविद्युत, भौगोलिक विविधता, जडिबुटी जस्ता हाम्रा तुलनात्मक लाभका क्षेत्रहरुको समुचित विकास एवं उपयोग गर्न र जनशक्तिलाई मुलुकभित्रै पर्याप्त रोजगारी दिई उनीहरुको क्षमताको सदुपयोग गर्न हामी अनवरत प्रयास गरिरहेका छौं ।
गरिवी अन्त्य र समृद्धि स्थापित गर्ने हाम्रो ध्येयभित्र देशमा आधुनिक कृषि, औद्योगिक विकास, रोजगारी सिर्जना, उद्यमशीलता, सममाजिक सुरक्षा र अवसरको न्यायोचित वितरण पर्दछ । समृद्धि परिपूर्ण लोकतन्त्रमा मात्र सम्भव छ । परिपूर्ण लोकतन्त्रले राजनीतिक अधिकार र स्वतन्त्रता, अधिकार र अवसरमा न्यायोचित पहुँच, सामाजिक न्याय र समानता, सुशासन, भयरहित र सुरक्षित तथा मर्यादित जीवन सुनिश्चित गर्छ । विगतमा देशमा एकातिर रोजगारीका अवसर सिर्जना हुन सकेन भने अर्काेतिर अनपेक्षित हिंसात्मक द्वन्द्वले लाखौं नेपाली गाउँबाट शहर र शहरबाट विदेशतिर जान बाध्य भए । विगतमा हाम्रो देश भित्र रोजगारी सिर्जना हुन सकेको भए कोरोना भारइरसको यस विश्वब्यापी महामारीले भत्काएको विश्व अर्थब्यवस्थाले उत्पन्न गरेको भयावह अवस्थाको ठाउँमा हाम्रो आफ्नै उत्पादन प्रणालीले संकटको सामना गर्ने सामथ्र्य राख्ने थियो । अन्तर्राष्ट्रिय गरिवी निवारण दिवसको यस अवसरमा हाम्रो जनशक्तिलाई दक्षता तथा सीप पलायनबाट जोगाउँदै स्वतन्त्र र आत्मनिर्भर अर्थतन्त्र निर्माण गर्ने फलदायी उद्यमशीलताको बाटोमा अग्रसर हुन सबैमा आह्वान गर्दछु ।
मुलुकको जनशक्तिलाई मुलुक निर्माणमा सदुपयोग गर्ने र समाजिक हितको सकारात्मक बाटोतर्फ डो¥याउन सचेत अभियानको आवश्यकता छ । गरिवीबाट समृद्धितर्फ अगाडि बढ्न नसके हाम्रो जनशक्तिलाई समाजका हानिकारक तत्वले आफ्नो अनुचित स्वार्थ पूरा गर्न दुरुपयोग गर्ने खतरा रहन्छ । समृद्धिका हरेक पहलकदमीमा अवरोध गर्दै गरिवीलाई आफ्नो अनुचित स्वार्थ सिद्ध गर्ने साधनका रुपमा सधैं दुरुपयोग गर्ने प्रवृत्तिबाट समाजलाई बचाउन सबै सजग रहनु पर्दछ । अहिले हामी रोजगारी र शिक्षाको अवसरका लागि विदेशिएका युवालाई स्वदेशमै रोजगारी र ब्यवसायको अवसर सिर्जना गर्न अग्रसर छौं । कोरोना महामारीपछि सिर्जना हुने सम्भावित बेरोजगारहरुको पंक्तिलाई रोजगारी उपलब्ध गराउने उपायको खोजीमा छौं । यस अग्रसरताले नेपाललाई अविकासबाट विकासतिर र पछौटेपनबाट समृद्धितिर, गरिवीबाट सम्पन्नतातिर र परनिर्भरताबाट आत्मनिर्भरतातिर लैजाने छ । राष्ट्रको यस संकल्पमा समाजका सम्पूर्ण तप्काको रचनात्मक सहभागिता हुनेछ भन्ने मैले आशा गरेको छु ।
अन्त्यमा, गरिबी निवारण तथा दीगो विकासका लागि योगदान पु¥याउने सम्बन्धित सबै सरकारी निकायहरु, सहकारी क्षेत्र, निजी क्षेत्र, गैर सरकारी संस्थाहरु, नागरिक समाज र विकास साझेदारहरुप्रति धन्यवाद ज्ञापन गर्दछु । कोभिड–१९ को विषम परिस्थिति सामना गर्दै मुलुकलाई गरिवीबाट समृद्धितर्फ लैजाने राष्ट्रिय आकाङ्क्षा पूरा गर्ने अभियानमा एकजूट भएर अघि बढ्न सम्पूर्ण दिदीबहिनी तथा दाजुभाइहरुमा हार्दिक आह्वान गर्दछु ।
१ कात्तिक २०७७