पोखरा । पोखरा २३ हर्पनमा रहेको निल गगन विकास समाजको आयोजनामा भएको विभिन्न खेलकुद प्रतियोगिता तथा तीज विशेष कार्यक्रम सम्पन्न भएको छ । श्री जनसिद्ध आधारभूत विद्यालय परिसरमा भएको भलिबल प्रतियोगितामा ८५ आदर्श क्लब प्रथम र ठूलाखेत भेट्रान्स टिम द्वितीय हुन सफल भए । भलिबलतर्फ बेस्ट प्लेयर सन्तोष गुरुङले प्राप्त गरे । त्यस्तै छेलो प्रतियोगितामा ईश्वरी भण्डारी प्रथम र ऋषिराम परियार द्वितीय भए । त्यस्तै एकल नृत्यतर्फ सुस्मिता केसी प्रथम अन्जिता सापकोटा द्वितीय र सुस्मिता देवकोटा तृतीय हुन सफल भए । त्यस्तैगरी तीज गीत प्रतियोगितातर्फ पधेरा खाल्टा दिदीबहिनी समूह प्रथम र सिद्धेश्वर दिदीबहिनी समूह द्वितीय स्थान हासिल गर्न सफल भए ।
कार्यक्रममा पोखरा वडा नम्बर २३ का वडा अध्यक्ष रामकाजी गुरुङ, वडा सदस्यहरू चेतबहादुर क्षेत्री, शान्ति शर्मा, रिता सुनार, धनबहादुर गुरुङ तथा समाजसेवी भेषराज पराजुली, उपेन्द्र पराजुली, लक्ष्मी पौडेल, बाबुराम पौडेल लगायतको उपस्थिति थियो । पोखरा २३ हर्पणमा भएको यो उक्त विशेष कार्यक्रममा तीज गीत प्रतियोगिताको संयोजक अप्सरा पौडेल, छेलो प्रतियोगिता संयोजक शिव पौडेल तथा भलिबल प्रतियोगिता संयोजक नारायण पौडेल रहेका आयोजक संस्थाका निवर्तमान अध्यक्ष युवराज पौडेलले जानकारी दिए ।
निल गगन विकास समाजका अध्यक्ष बैकुण्ठप्रसाद पौडेलको अध्यक्षतामा भएको कार्यक्रममा स्वागत मन्तव्य जनसिद्ध आधारभूत विद्यालयका प्रधानाध्यापक लेखबहादुर क्षेत्रीले राखेका थिए । कार्यक्रमको सञ्चालन संस्थाका सचिव शिव परियारले गरेका थिए ।
भलिबलतर्फ प्रथम हुनेले खसी, मेडल र प्रमाणपत्र प्राप्त गरे भने दोस्रो हुनेले बोका, मेडल र प्रमाणपत्र प्राप्त गरे । त्यस्तै उत्कृष्ट खेलाडीलाई ट्रफी र प्रमाणपत्रद्वारा सम्मान गरियो ।
यता तीज गीत प्रतियोगितामा प्रथम हुनेले नगद रु. ५ हजार र दोस्रो हुनेले रु. ३ हजार पुरस्कार प्राप्त गरे । त्यस्तै, छेलो हान्ने प्रतियोगितामा पहिलो हुनेले रु. १ हजार र दोस्रो हुनेले रु. ५ सय प्राप्त गरे ।