पोखरा, १५ भदौ ।“जहाँ औषधी त्यहाँ फर्मासिष्ट” भन्ने मूल नाराका साथ अगाडि बढेको नेपाल फार्मेसी संघ कास्कीको प्रथम भेला तथा अधिवेशन सम्पन्न भएको छ ।
भेलाले साजन भण्डारीको अध्यक्षतामा १७ सदस्यीय जिल्ला कार्यसमिति चयन गरेको छ । जसको उपाध्यक्षद्वयमा अर्जुन धिताल, नवराज पौडेल, महिला उपाध्यक्ष प्रिया शर्मा, महासचिव सन्तोष शर्मा, सचिवद्वयमा सफल पाण्डे, राम कुमार श्रेष्ठ, महिला सचिव सुनिता पौडेल, कोषाध्यक्ष मिलन क्षेत्री, सहकोषाध्यक्ष विष्णु प्रसाद ढकाल रहेका छन् । त्यसैगरी सदस्यहरुमा सुष्मा पोखरेल, संगिता के.सी., सागर पुन, नरेन्द्र शाही, राजेश न्यौपाने, विकास खड्का र पवन तिवारी रहेका छन् ।
भेलालाई सम्वोधन गर्दै कार्यक्रमका प्रमुख अतिथि पोखरा महानगरपालिका प्रमुख धनराज आचार्यले पेशागत हकहितका लागि पोखरा महानगरपालिका सधै तपाइँहरुको साथमा रहेको बताउनुभयो । उहाँले “तपाइँहरुको यो व्यवसाय नभई पेशा हो, हेक आम नेपालीको स्वास्थ्यसँग तपाइँहरुको पेशा जोडिएको हुन्छ, त्यसैले तपाइँहरुको पेशालाई थप मर्यादित बनाउन हामी सधैं सकारात्मक रहेका छौं” भन्नुभयो ।
नेपाल फार्मेसी संघका केन्द्रीय अध्यक्ष युवराज भुसालले नयाँ नेतृत्वले फार्मेसी क्षेत्रका हक अधिकार र पेशागत अधिकारका लागि सक्रिय भूमिका निर्वाह गर्न आह्वान समेत गर्नुभयो । उहाँले आफ्नो पेशालाई मर्यादिन बनाई संघलाई चलायमान राखी अगाडि बढ्न आग्रह गर्नुभयो ।
उद्घाटन सत्रमा बोल्दै नेपाल फार्मेसी संघका केन्द्रीय महासचिव सुवर्णराज पन्तले अब हामी आफ्नो व्यवसायको हकहितका लागि जस्तोसुकै कदम चाल्न पनि पछि नपर्ने बताउनुभयो । आफ्ना पेशाको हक हितको लागि नेपाल फर्मेसी संघसँग जोडिन आम फार्मेसी संघसंस्थाहरुलाई आग्रह गर्नुभयो ।
कार्यक्रममा पोखरा स्वास्थ्य विज्ञान प्रतिष्ठानका प्रतिनिधि भुपेन्द्र पौडेलले समेत बोल्नुभएको थियो ।
नेपाल फार्मेसी संघ गण्डकी प्रदेशका अध्यक्ष विना मल्लको अध्यक्षतामा सम्पन्न् कार्यक्रममा स्वागत साजन भण्डारीले गर्नुभएको थियो भने कार्यक्रमको संचालन सन्तोष शर्माले गर्नुभएको थियो ।