पोखरा, जेठ १२ गते । । पोखरा महानगरपालिका खेलकुद विकास समितिको आयोजना र स्क्वास –याकेट एसोसिएसन, कास्कीको व्यवस्थापनमा महानगरस्तरीय दोस्रो स्क्वास प्रतियोगिता पोखरा रंगशालामा सुरु भएको छ । उद्घाटन खेलमा राजन पौडेलले इन्द्र पौडेललाई २–० को सेटमा पराजित गरे । राजनले पहिलो सेट ११–८ र दोश्रो सेट ११–० मा पराजित गरे ।
शनिबारसम्म हुने प्रतियोगितामा भेट्रान्स ,बिगिनर्स र खुल्ला गरेर तिन विधामा सञ्चालन गरिएको प्रतियोगिता संयोजक विश्वकुमार विजुक्छेले जानकारी दिनुभयो । प्रतियोगिता रंगशालास्थित स्क्वास राकेट भवनमा सञ्चालन भएको छ ।
प्रतियोगिताको उद्घाटन गण्डकी प्रदेशका पूर्वअर्थमन्त्री किरण गुरुङले उद्घाटन गरे । उनले स्क्वास खेललाई ब्यवसायीक बनाउदै नयाँ खेलाडी उत्पादनमा ध्यान दिनुपर्ने बताए । पोखरा महानगर खेलकुद विकास समितिका अध्यक्ष दिपकबहादुर गोदारले नयाँ खेलाडी उत्पादनमा संघले ध्यान दिनुपर्नेमा जोड दिए ।
दुई दशकभन्दा अगाडिदेखि नै खेल्न सुरू भए पनि यो खेलबारे कमै चर्चा हुने गर्छ । त्यसैले खेल प्रवद्र्धन र भइरहेका खेलाडीको स्तरोन्नति गर्ने उद्देश्यले प्रतियोगिता गर्न लागिएको स्क्वास राकेट एसोसिएसन, कास्कीका महासचिव प्रवीण पालिखेले बताउनुभयो ।
प्रतियोगितामा प्रथम, द्वितीय र तृतीय हुनेलाई नगद पुरस्कारसहित मेडर र प्रमाणपत्र पुरस्कार प्राप्त गर्ने छन् । तृतीय हुने दुई जनाले पुरस्कार पाउने छन् । खुल्ला तर्फ पुरस्कार १० हजार प्रथम , द्वितिय ५ हजार र तृतिय ३ हजार नगद रहेको छ ।