पोखरा,माघ १७ गते । पोखरा महानगरपालिका वडा नं. ५ जिरो किलोमिटर स्थित रिजनल हस्पिटल प्रालिको तेस्रो साधारण सभा सम्पन्न भएको छ । अहिलेसम्म भएका कार्य विवरण तथा भावि योजना सहित आज हस्पिटलको साधारण सभा सम्पन्न भएको हो ।
सभाको उद्घाटन पश्चात हस्पिटलका अध्यक्ष डा. जगत बहादुर खड्काले सेवाग्राहीलाई सुलभ दरमा उत्कृष्ट सेवा प्रवाह गरेकाले हस्पिटलले सेवाग्राहीको मन जितेको बताए ।हाल ५० शैयाद्वार सेवा दिईरहेको जानकारी दिँदै अध्यक्ष खड्काले अस्पतालको सेवा विस्तार गर्दै ५० शैया थप गरि १ सय शैया बनाउनका लागि आवश्यक प्रक्रिया अगाडी बढार्ईएको जानकारी दिए । साथै सेवाग्राहीबाट लिईने टिकटको मुल्य अझ सुलभ बनाउने तयारी रहेको उनको भनाई छ ।
त्यस्तै हस्पिटलकी मेडिकल डाइरेक्टर डा. तारा गुरुङले छोटो समयमा नै हस्पिटलले सेवाग्राहीको विश्वास जित्न सफल भएको बताईन् । यता हस्पिटलका व्यवस्थापक अर्जुन प्रसाद शर्माले कोरोनाको अवधिमा सेवाग्राहीमा कमी आएको बताए । उनले गत २ वर्षमा हस्पिटलले गरेका उपलब्धिका विषयमा जानकारी दिएका थिए ।
कार्यक्रममा हस्पिटलको कमी कमजोरी छ भने औल्याएर तत्कालै सुधार गर्नुपर्ने वक्ताहरुको जोड थियो । कर्मचारीको मनोवल उच्च राख्न र उनीहरुको कामको सम्मानस्वरुप उत्कृष्ट ४ कर्मचारीलाई उक्त कार्यक्रममा सम्मान समेत गरिएको छ । सम्मानित हुनेमा आसरी गुरुङ, सुर्यकुमारी घर्ती, बसुन्धरा गिरी र निता भण्डारी रहेका छन् ।
२०७३ सालमा सेवा विस्तार गरेको हस्पिटलले २०७५ सालदेखि काठमाडौंको बि एण्ड बि हस्पिटलसँग सहकार्य गर्दै आएको छ । स्थापनाकालदेखिनै हस्पिटलले विभिन्न ठाउँमा निशुल्क स्वास्थ्य सिविर पनि गर्दै आएको छ ।